Bashkëkryetari i Komisionit të Posaçëm për Reformën Zgjedhore, Damian Gjiknuri, tha se reforma zgjedhore mund të mbyllet deri më 31 Maj, por pa ndryshim të sistemit zgjedhor.
Në një intervistë për “Abcnews.al”, Gjiknuri përsëriti edhe njëherë se çështja e sistemit zgjedhor kërkon shumë kohë.
“Asnjë nuk ka hequr dorë nga afati i 31 majit sepse ushtrojnë presion pozitiv tek palët. Deri në 31 maj kemi të gjithë mundësitë që të gjejmë marrëveshje. 31 maji është datë e rëndësishme, prandaj vendosëm që të punojmë intensivisht. Çështja e sistemit zgjedhor kërkon shumë kohë, nuk mund të realizohet brenda 31 majit, palët kanë rënë dakord se meqë përfshin Kushtetutën, kjo do të kërkojë debat dhe konsult shumë të gjerë dhe nuk do të ishte e mundur që brenda 31 majit mund të adresonin ribërjen e sistemi zgjedhor“, tha Gjiknuri.
Ambasadorja e SHBA, Yuri Kim, pas një takimi që pati sot me kryedemokratin Lulzim Basha tha se “reforma zgjedhore duhet të përfundojë Brenda datës 31 maj dhe ky është një afat kohor që nuk e ka vendosur as Ambasada amerikane dhe as ndërkombëtarët”.
Kryetari i PD, Lulzim Basha deklaroi se “do bëjmë gjithçka që brenda 31 majit, një afat që ne ja kemi kërkuar dhe ia kemi vendosur kësaj mazhorance, që reforma të ketë përfunduar”.
