Kryendeshja e javës së 27-të në Bundesliga do të jetë ajo mes Wolfsburgut dhe Borussia Dortmund. Javën e kaluar verdhezinjtë u rikthyen me një fitore të madhe 4-0 ne derbi ndaj Shalkes, ndërsa “ujqërit” ia dolën për të mundur brenda në Bavari ekipin e Augsburgut.
Vendasit janë një “kockë e fortë” dhe për momentin ekipi i drejtuar nga austriaku Oliver Glasnner pozicionohet në vendin e gjashtë, pra brenda zonës europiane, sidoqoftë verdhezinjtë duket se i kanë “ujqërit” gjahun e tyre të preferuar, sepse Borusia ka fituar 8 nga 9 përballjet e fundit ndërmjet tyre në kampionatin gjerman.
Verdhezinjtë regjistruan fitoren e pestë radhazi dhe të 8-ën në 9 sfidat e fundit në kampionatin gjerman, ecuri tepër pozitive falës së cilës Dortmundi është katapultuar në vendin e dytë, me vetëm 4 pikë më pak se kampionët në fuqi, madje duelin me Bajernin ekipi i drejtuar nga zvicerani Lucien Favre do ta ketë të martën e ardhshme pikërisht në Westfalen Stadion.
Në “Volkswagen Arena”, sulmuesi me origjinë shqiptare, Admir Mehmedi, do ta fillojë takimin përsëri si titullar pas sulmuesit të përzgjedhur, që me shumë gjasa pritet të jetë golashënuesi më i mirë i skuadrës, holandezi Wout Weghorst, që në Augsburg mungoi për shkak të kartonëve.
Ndërkohë një tjetër ndeshje e fortë, do të jetë ajo mes vendit të tretë që mbahet nga Monchengladbach dhe vendit të pestë që mbahet nga Bayern Leverkusen. Skuadrat ndahen nga vetëm 2 pikë ndërsa objektivi më real i skuadrave është një vend për në Ligën e Kampioneve për sezonin e ardhshëm.
Të dyja takimet luhen sot në orën 15:30.
