Skuadra e Brescias prej dhjetë ditëve ka rifilluar stërvitjet individuale në qendrën e tyre sportive, por gjatë kësaj kohe, Mario Balotelli nuk ka qenë asnjëherë prezent në ambientet e klubit.
Seancat e stërvitjes janë opsionale por, siç thekson Tuttosport, është e qartë se mungesa e Balo-s bën zhurmë. Pjesërisht sepse ajo që bën (ose nuk bën) sulmuesi është gjithmonë nën vëzhgimin e mediave, ose duke marrë parasysh se shokët e tjerë të skuadrës janë shfaqur të paktën një herë në stërvitje.
E ardhmja e SuperMario-s te Brescia prej kohësh është vënë në dyshim, ndërsa eksperti i merkatos Nicolo Schira, bën të ditur se lojtari do të largohet nga klubi dhe opsionet për skuadrën e radhës të italianit janë dy. Bëhet fjalë për Brazilin dhe Turqinë, dy vendet që interesohen për 29-vjeçarin.
Galatasaray dhe Vasco de Gama e duan sulmuesin që ka një kontratë deri në vitin 2022 por duhet thënë që “dallëndyshet” janë me një këmbë në Serie B.
Mario #Balotelli will leave #Brescia at the end of the season. #Galatasaray and #VascoDaGama are interested in him and have opened talks with his agent Mino #Raiola. #transfers
— Nicolò Schira (@NicoSchira) May 21, 2020
