Ministri i Energjisë dhe Industrisë Damian Gjiknuri ka reaguar pas akuzave të ish-kryeministrit Sali Berisha, i cili tha sot se marrëveshja e KESH-it me firmën serbe është bërë në sekret të plotë dhe janë mënjanuar disa kompani të tjera të cilat kanë paraqitur edhe ankesën e tyre pranë ERE-s.
Sipas Berishës, ministri i Energjetikës, Damian Gjiknuri është përfshirë në këtë aferë korruptive, që ka të bëjë me Kaskadën e Drinit, ndërsa kërkoi edhe hetimin e ministrit.
Ministri Gjiknuri thotë se Berisha e akuzon për arsye se PD humbi zgjedhjet në Dibër.
“Sali Berisha gjithçka e ka bërë dhe vazhdon ta bëjë për interesa krejtësisht të ngushta politike e financiare të tijat. Mjafton të kujtojmë se si i favorizoi në 8 vjet kompanitë e huaja të tregtimit të energjisë duke i shkaktuar së paku 150 milion euro në vit humbje Buxhetit të Shtetit dhe taksave të shqiptarëve nga toleranca e vjedhjes dhe abuzimi me energjinë elektrike, të cilën e blinte nga këta tregtarë prej importit. Mjafton të kujtojmë se si e urdhëronte me telefon dhe shkresa zyrtare Entin Rregullator për çdo vendimmarrje.
Është ky varrmihës që bllokoi ndërtimin e linjës së interkonjeksionit mes Shqipërisë e Kosovës pikërisht për të favorizuar lidhjet e tija klienteliste financiare me tregtarët e energjisë, duke izoluar e vënë në varësi të Serbisë jo vetëm Kosovën por edhe Shqipërinë. Përfundimi i linjës së interkonjeksionit Shqipëri-Kosovë është një vepër që e ka lënduar shumë varrmihësin e sektorit energjitik por shqiptarët nuk i kanë harruar bëmat e tij”, deklaroi Gjiknuri.
