Një efektiv policie ka rënë pre e dy hajdutëve në autobusin e linjës së Kamzës. Policia njoftoi arrestimin e një personi dhe shpalljen në kërkim të një tjetri si autorë të dhunimit të agjentit të antidrogës, mëngjesin e së enjtes pranë Casa Italia.
Në pranga ka rënë Alfons Loci 29 vjeç ndërsa po punohet për kapjen e A.D. 25 vjeç, i cili rezulton të jetë i dënuar më parë. Alfons Loci në bashkëpunim me A.D., kanë tentuar të vjedhin me dhunë, duke goditur me grusht punonjësin e policisë K.B 22 vjec.
Agjenti ndodhet i shtruar në spital, me 2 fraktura ne nofull, por jashtë rrezikut për jetën. Nga veprimet e kryera rezulton që këta 2 persona janë autor të dyshuar të 4 ngjarjeve të ndodhura në territor të Komisariatit Nr.3 dhe Nr.6.
Më datë 22.09.2016, në Bulevardin “Zogu I Parë”, tek një restorant, shtetases R. B., me origjinë Norvegjeze, i kanë marrë portofolin ku në brendësi ka pas një shumë monetare.
Më datë 21.09.2016, tek terminali i autobuzave të jugut, shtetasit A. H., i kanë marrë portofolin ku në brendësi ka pas një shumë monetare.
Më datë 29.07.2016, në rrugën “Dritan Hoxha”, në autobzin e linjës së Tiranës së Re, shtetases M. H., i kanë marrë portofolin ku në brendësi ka pas një shumë monetare.
Më datë 05.08.2016, në Rrugën “Asim Vokshi”, në autobzin e linjës së Unazës, shtetases B. P., i kanë marrë aparatin telefonik.
