Deputeti i Partisë Demokratike, Arben Ristani ka akuzuar kolegun e tij socialist Paulin Sterkaj se ka qenë i përfshirë në trafik droge dhe prostitucioni në kohën kur ai ishte shef i Komisariatit të policisë së Lezhës.
Ristani në Kuvend tha se akuzat e tij bazoheshin në një dokument zyrtar me firmë e vulë të SHISH, të cilin e tregoi para Parlamentin, që i drejtohej kryeministrit të asaj kohe Ilir Meta ku shkruheshin akuzat ndaj Sterkaj.
“Unë kam një dokument zyrtar me firmë dhe vulë që i drejtohej kryeministrit të asaj kohe Ilir Meta dhe ministrit të Brendshëm. Sipas këtij dokumenti thuhet që shefi i Komisariatit të policisë së Lezhës Paulin Sterkaj, merrej me trafik droge dhe prostitutash. Po e citoj dhe s’dua të lexoj emrat e tjerë por është me firmë e me vulë. Merrej me trafik droge dhe prostitucion, me dokument”.
Deputeti i PD tha se një gjë të tillë e tregoi “për të ilustruar se çfarë ka mbledhur Aleanca e cila mori pushtetin duke rrëzuar Sali Berishën. Pra ishte motoja e asaj kohe, e asaj aleance për të marrë pushtetin, që duhet të bashkoheshin qelbësirat e të merrnin pushtetit.”
