Lëvizja Vetëvendosje në Shqipëri, nëpërmjet një statusi në Facebook bën thirrje të lirohen mbrojtësit e Teatrit, pasi sot, një ditë pas protestës qytetare në mbrojtje të Teatrit Kombëtar, në komisariatet e Policisë së Shtetit, ende mbahen të arrestuar disa protetues, midis tyre edhe drejtori ekzekutiv i LVV Shqipëri Boiken Abazi.
Më tej, Vetëvendosja thekson se arrestimi i Boiken Abazit është i pabazuar, prandaj mbajtja e tij në arrest është dhunim i të drejtave të qytetarit dhe i urdhëruar politikisht.
Statusi i plotë:
Lironi mbrojtësit e Teatrit!
Sot, një ditë pas protestës qytetare në mbrojtje të Teatrit Kombëtar, në komisariatet e Policisë së Shtetit, ende mbahen të arrestuar disa protetues, midis tyre edhe drejtori ekzekutiv i LVV Shqipëri Boiken Abazi.
Ata akuzohen për kundërshtim me forcë të punonjësve të policisë. Në pamjet filmike të shfaqura në televizione dhe të siguruara nga Qendra e Lëvizjes VETËVENDOSJE! në Shqipëri dhe në dijeninë tonë, arrestimi i Boiken Abazit është i pabazuar, prandaj mbajtja e tij në arrest është dhunim i të drejtave të qytetarit dhe i urdhëruar politikisht.
Me sa duket pushteti, tashmë plotësisht ilegjitim, kërkon të frikësojë aktivistët dhe të mbysë zërin e qytetarëve protestues.
Kërkojmë që Prokuroria të shqyrtojë urgjentisht rastin e Boiken Abazit dhe të qytetarëve të tjerë të arrestuar dhe të proçedojë penalisht shkelësit e vërtetë të Kushtetutës e të ligjit që janë rrënuesit e Teatrit Kombëtar dhe dhunuesit e qytetarëve të Republikës.
Ndalimi dhe mbajtja nën arrest e aktivistëve tanë nuk do të na ndalë që të ngrihemi së bashku me qytetarët e tjerë në mbrojtje të të drejtave dhe lirive tona.
Ata që sot rezistojnë, nesër fitojnë!
Tiranë, 18 maj 2020
Lëvizja VETËVENDOSJE!
Qendra në Shqipëri
