Kryebashkiaku Erion Veliaj e konsideroi Teatrin Kombëtar, godinën që shembi mëngjesin e djeshëm, si çadrën nr 2 të Partisë Demokratike.
Duke folur me përçmim për godinën e Teatrit Kombëtar, Veliaj tha se ajo ishte me çati llamarine, me tallash dhe kompesata.
Sipas tij, mbi këtë godinë nuk mund të ndërhyhej për rikonstruksione.
“Zgjodhëm momentin për të shembur godinën në atë orë për të pasur riskun më të vogël ndaj pakicës. Përtej ekseseve nuk ndodhi asgjë tjetër”, tha Veliaj.
Madje kryebashkiaku tha se për Teatrin Kombëtar referendumin politik duhej ta kërkonin ata që kundërshtonin projektin.
“Referendumi për Teatrin ishin zgjedhjet e 30 qershorit. Unë u paraqita në referendum, kur ata nuk erdhën. Ata braktisën referendumin, Këshillin Bashkiak dhe Kuvendin, atëherë ne çfarë duhet të bënim ne të prisnim ata, që mund të mos vijnë as në zgjedhjet e ardhshme”, tha Veliaj.
Me një cinizëm, Veliaj tha se shtrirja e dorës ndaj atyre që kundërshtonin dje, është edhe sot.
“Do kemi një shtëpi të re, Teatri kishte kaluar në vdekje klinike. Kjo agoni do të vazhdonte, më mirë një vendim i vështirë tani, ndoshta jo shumë popullor, se sa një godinë që ishte e vdekur”, tha Veliaj.
Sipas tij, asnjë trup e huaj nuk pranonte të performonte aty, madje ishte në rrezik shembjeje edhe sipas Institutit të Ndërtimeve.
“Ishte kthyer Teatri në një minimarket moltosh dhe lëngjesh”, tha Veliaj.
