Edhe Partia Republikane ka konfirmuar pjesëmarrjen në protestën e sotme në 16:30 të thirrur nga Aleanca për Mbrojtjen e Teatrit.
Kreu i kësaj force politike Fatmir Mediu, iu bën thirrje të gjithë qytetarëve t’i bashkohen protestës së sotme të opozitës.
Ai tha në fund të mbledhjes së Kryesisë së partisë se opozita do të jetë e bashkuar me qytetarët dhe artistët kundër qeverisë.
Sipas Mediut, Rama po e kthen vendin në kohët e errëta të diktaturës, ndërsa shtoi se pas protestës opozita duhet të dalë me një qëndrim të qartë për të garantuar zgjedhje të lira e të ndershme.
“PR do të jetë sot me artistët. Opozita jo vetëm do të jetë e bashkuar brenda vetes së saj, por do jetë me çdo qytetar, të majtë e të djathtë. Nuk është vetëm protesta e sotme, por opozita duhet të hapë sytë e saj dhe të qytetarëve se nuk duhet të vazhdohet kështu. Rama po e rikthen vendin në kohët e errëta të diktaturës. Në mbledhjen e sotme të Kryesisë së PR kemi kërkuar një mbështetje dhe angazhim masiv për protestën e sotme. Pas kësaj proteste, opzoita duhet të dalë me një qëndrim të qartë për të garantuar zgjedhje të lira e të ndershme”, tha Mediu.
Kujtojmë se mbrëmjen e djeshme pjesëmarrjen në këtë protestë e konfirmoi dhe PArtia Demokratike dhe Lëvizja Socialiste për Integrim.
