7 personave nga 61 të shoqëruarit gjatë ditës së djeshme iu është prerë fletë arresti, për protestat kundër shembjes së godinës së Teatrit Kombëtar.
Burime zyrtare njoftojnë se bëjhet fjalë për shtetasit:B. A., 38 vjeç; K. Q., 37 vjeç; S. N., 35 vjeç; R. L., 35 vjeç; E. M., 33 vjeç, B. T., 30 vjeç; E. Xh., 33 vjeç.
Mësohet se janë shtetasit Bolken Abazi. Kastriot Qemaj. Sokol Ndoj. Romeo Lila, Endrit Mertiri. Burim Tafilica. Edjon Xhoxhaj.
Ata akuzohen për veprat penale “Kundërshtim me dhunë i punonjësit të policisë së rendit publik” dhe “Pjesëmarrja në grumbullime të paligjshme”.
Policia pretendon se ata kanë kundërshtuar me dhunë uniformat blu, duke tentuar që të pengonin autoritetet në zbatimin e vendimit. Disa persona nga radhët e tubuesve kanë qëlluar herë pas herë në drejtim të forcave të Policisë, me sende të forta dhe shkopinj, duke lënduar 7 punonjës policie në detyrë.
Ndërkohë mësohet se 21 persona të tjerë janë proceduasr në gjendje të lirë për veprën penale “Pjesëmarrja në grumbullime të paligjshme”.
Ndërsa për 36 persona të tjerë që ishin të shoqëruar në ambientet e Komisariateve mësohet se është marrë masë administrative në zbatim të Aktit Normativ për marrjen e masave të veçanta kufizuese, me qëllim parandalimin e përhapjes së COVID-19.
Në njoftimin e saj policia nuk bën me dije nëse kanë nisur apo jo hetimet dhe për efektivët e policisë, pasi dhe këta të fundit kanë ushtruar dhunë ndaj qytetarëve, e cila ësjhtë e faktuar dhe me pamje.
