Kaliari ka qenë viktima e Juventusit pasi këta të fundit donin të linin pas krahëve humbjen me Interin. Plot katër gola i kanë shënuar bardhezinjtë ekipit nga Sardenja.
14 minuta lojë i janë dashur vendasve për të zhbllokuar ndeshjen me Daniele Ruganin, i cili ka realizuar edhe golin e tij të parë me fanellën e Juventusit. 20 minuta më vonë ka ardhur dyfishimi i avantazhit me Higuain. Në minutën e 39-të Dani Alves, edhe ai në realizimin e tij të parë me bardhezinjtë, ka shënuar golin e tretë. Autogoli i Ceppitelli-t në minutën e 84-t ka fiksuar rezultatin në 4-0.
Ndërsa Interi i falet sërish Mauro Ikardit. Sulmuesi argjentinas, pas golit në fitoren e rëndësishme të marrë kundër Juventusit të dielën, ka qenë përsëri protagonist në mbrëmjen e sotme, teksa Inter ka marrë fitoren e dytë radhazi në kampionat në fushën e Empoli-t. Zikaltrit kanë zgjidhur gjithçka në pjesën e parë, me Icardi-n që ka shënuar dy herë në harkun e shtatë minutave.
Ndërsa Napoli është ndalur nga një barazim pa gola në fushën e Xhenoas, duke humbur kështu vendin e parë dhe duke zbritur në vendin e dytë, një pikë larg Juventus, ndërsa Roma është kthyer te fitorja pas humbjes së pësuar fundjavën e kaluar kundër Fiorentinës. Verdhekuqtë kanë fituar me rezultatin 4-0 kundër Krotones. Kievo ka mundur Sasuolon 2-1, teksa Atalanta-Palermo është mbyllur 0-1, Peskara-Torino në barazim pa gola dhe Udineze me Fiorentina-n kanë ndarë nga një pikë, me ndeshjen që është mbyllur me rezultatin 2-2.
