Policia e Tiranës ka vënë në pranga një 31-vjecar pas skandalit me OSHEE.
Mësohet se Emirjon Lluka, punonjës i një firme private sigurimi është arrestuar pas pamjeve filmike të transmetuara në Emisionin investigativ “Stop” në TV “Klan”, ku shërbente si sekser, duke i marrë një qytetari një shumë parash në këmbim të shlyerjes së faturave debitore si invalid.
Lluka akuzohet për veprën penale të “Korrupsionit pasiv të personave që ushtrojnë funksione publike”, parashikuar nga neni 259 i Kodit Penal.
Por policia është mjaftuar me ndjekje penale në gjendje të lirë për dy punonjësit e OSHEE, të cilët do të bënin ndërhyrjen në sistem.
• E. M., 27 vjeç, banues në Tiranë, me detyrë specialist të Kujdesit Ndaj Klientit OSHEE.
• M. B., 30 vjeçe, banues në Tiranë, me detyrë specialiste të Kujdesit Ndaj Klientit OSHEE.
Ata akuzohen për veprën penale të “Korrupsionit pasiv të personave që ushtrojnë funksione publike”, parashikuar nga neni 259 i Kodit Penal.
Nga hetimet e kryera, ka rezultuar se Lluka, i ka kërkuar dhe marrë një qytetari shumën prej 35.000 leke të reja në këmbim të heqjes së kamatë vonesës në vlerën 120.000 lekë të reja që ai kishte si debi ndaj kompanisë OSHEE.
Materialet proçeduriale i kaluan Prokurorisë pranë Gjykatës së Shkallës së Parë Tiranë.
