Një nga intervistat më të ndjera, më prekëse dhe më ndriçuese për çështjen e Teatrit, kjo sonte e Adi Krastës me shkrimtarin Ylli Demneri që jeton në Paris. Demneri ka folur për vlerën dhe magjinë që ka një Teatër i vjetër, për muret dhe historinë e tij, për shpirtin që përcjell skena ku janë ngjitur aktorët e mëdhenj. Ai thekson, se nëse do të kishte një projekt të tillë në Paris, për shembjen e një godine të ngjashme, do të kishte çdo ditë revolta të qytetarëve. Më poshtë pjesë nga intervista, e dhënë tek Syri.Tv.
“E kam ndjekur dhe më vjen jashtëzakonisht keq. Teatri është tempull. Është shenjtëruar, Nga zërat e aktorëve. Nga këto zëra aktorësh. Ato mure ruajnë zërin, emocionin, heshtjen. Këto mure kanë 75 vjet që ruajnë gjithë ato gjëra. Si ka mundësi që ka aktorë që kanë kaluar jetën në atë teatër dhe nuk ndjehen. Kanë marrë duartrokitje të forta, si ka mundësi? Nuk jam naiv të mos e kuptoj. Mund të jenë të partisë në pushtet, mund të kenë fëmijët në institucione shtetërore”, tha Demneri.
A ndodh edhe kjo në Paris? A mund të prishë KB një teatër dhe të ndërtojnë aty disa kulla?
“Është e pamundur! Do kesh të gjithë artistët në rrugë. Do ketë revoltë dhe manifestime të përditshme. Ka teatër 2 mijë vjeçarë dhe nuk kanë një arkitekturë kushedi. Më pëlqejnë teatrot e vjetër dhe duhet ti ruajmë ato. Nuk kemi fatin të kemi shumë monumente kulture. Historia e Shqipërisë dhe Tiranës ka qenë e tmerrshme. Ato pak monumente që kemi duhet ti ruajmë si sytë e ballit. Është shenjtëruar ky teatër”- tha Ylli Demneri.
