Analisti, Afrim Krasniqi, drejtues i Institucionit të Studimeve Politike, komentoi në A2 zhvillimet e fundit për reformën zgjedhore dhe tryezën virtuale të së hënës të Këshillit Politik.
“Këshilli Politik, jo për qytetarin, por përgjigje ndaj ndërkombëtarëve”
“Këshilli Politik nuk është një strukturë shtetërore, as strukturë institucionale, por është një organizim jo ligjor i krijuar nga partitë politike dhe si i tillë, gjithçka që diskutohet aty, përfshirë edhe procesverbalin, nuk është dokument zyrtar. Është më shumë një përgjigje e partive politike ndaj presionit të BE-së. Palët i kanë të qarta qëndrimet e tyre, por kjo nuk është i mjaftueshme pasi atyre u duhet dhënë legjitimitet. Për të fituar kredenciale politike në këtë lloj periudhe, palët u takuan dhe krijuan një agjendë, e cila pavarësisht se na ka dhënë një datë të re, që është data 31 maj, duhet t’u kujtojmë qytetarëve se dokumenti i parë kur është krijuar Këshilli Politik ka pasur një datë fiks dhe angazhimi ka qenë që në 15 mars do të kishim reformën zgjedhore. Kjo datë ka kaluar dhe nuk ka lidhje me koronavirusin. E gjitha kjo që ndodh sot nuk është më për qytetarin shqiptar, sa është e adresuar për faktorin ndërkombëtar”.
“Palët mund t’i bashkojnë rekomandimet e ODIHR-it dhe të OSBE-së”
“Kur diskutohet për reformën zgjedhore, nuk kemi të bëjmë me një gjë të përcaktuar ku palët duhet të mbajnë një pozicion ndaj saj, por kemi të bëjmë me interpretime të ndryshme të aktorëve politik për qëllime elektorale. Palët mund t’i bashkojnë rekomandimet e ODIHR-OSBE-së, të cilat janë detyrim për Shqipërinë. Si të tilla, duhet të marrin përgjigje të prerë në këtë tryezë. Elementët e tjerë janë pjesë e pazareve politike. Palët mendojnë krejt ndryshe nga ato që thonë në politik dhe agjendat e tyre janë krejt më të ndryshme se sa nevoja për një konsensus të madh politik”.
“Nuk besoj se palët duan të ndryshojnë sistemin”
“Nuk besoj se palët duan të ndryshojnë sistemin dhe nuk besoj se do ta ndryshojnë. Partitë kryesore janë deklaruar qartësisht me pozicione të distancuara nga deklaratat e viteve të kaluara kur kanë dhënë për ndryshimin e sistemit. Kur PS ka qenë në opozitë, ka premtuar se do ta rishikojë sistemin. Kur PD bëri atë lëvizjen e “republikës së re”, premtoi një ndryshim radikal të sistemit. Palët kanë hequr dorë nga ky qëndrim dhe aktualisht janë për një moderim teknik të sistemit, se sa për ndryshimin e tij. Edhe nisa e ardhur sot, në thelb nuk e ndryshon sistemin në thelb sepse kjo nismë dhe nisma e vitit të kaluar e sjellë nga një grup tjetër i shoqërisë civile, në thelb janë me pyetjen: Nëse duhet ndryshuar sistemi? Megjithatë, këto nisma nuk ofrojnë një formulë konkrete. Kjo duket një çështje e mbyllur për zgjedhjet e ardhshme. Më shumë është një karrem elektoral politik, për të mbajtur atë që quhet opozita e re në debatet e komisionit dhe për t’i marrë votat në parlament, se sa realisht një shqetësim për ndryshimin.
“Reforma duhet të rishikonte sistemin përfaqësues dhe një ndryshim radikal të financimit”
“Reforma e re duhet të kishte rishikim të plotë të sistemit përfaqësues në Shqipëri, i cili është tërësisht i deformuar. Së dyti, një ndryshim radikal të financimit, nga burimet informale, kriminale dhe që partitë të jenë transparente. Kjo ngelet “Thembra e Akilit” për këtë reformë. Gjithçka tjetër është një ndryshim teknik, i cili nuk ndryshon thelbin e zgjedhjeve në Shqipëri. Me siguri, pas zgjedhjeve të ardhshme do të kemi një komision tjetër që do t’i rikthehet edhe njëherë të njëjtës retorik”.
