Nga BoldNews.al
Inspektorati i Lartë i Deklarimit dhe Kontrollit të Pasurive (ILDKPKI) ka njoftuar se zyrtarët që janë subjekte të ligjit duhet të dorëzojnë formularët deri në 1 Qershor 2020.
Afati ligjor për dorëzimin e deklaratave periodike vjetore është 31 Marsi i çdo viti. Por, për shkak të situatës me pandeminë Covid-19, ILDKPKI vendosi që të shtynte procesin e dorëzimit të formularëve në një moment të dytë.
Tashmë që Qeveria Shqiptare ka vendosur të lehtësojë gradualisht masat e kufizimit të lëvizjes dhe të aktivitetit të institucioneve, ILDKPKI ka përcaktuar afatin e ri për plotësimin dhe dorëzimin e deklaratave të pasurisë.
Ligji “Për deklarimin e pasurisë” parashikon që plotësojnë formularët përkatës zyrtarët nga Presidenti i Republikës, deputetët, kryeministri e anëtarët e Këshillit të Ministrave, të gjithë gjyqtarët e prokurorët, si edhe një numër i madh funksionarësh shtetërore, deri në nivelin drejtor drejtorie.
Në një njoftim të publikuar në faqen zyrtare të internetit, Inspektorati i Deklarimit të Pasurive njofton se “Zyrtarët/subjektet deklarues dhe personat e lidhur duhet të dorëzojnë formularin deri më 1 qershor 2020”.
Sipas njoftimit, zyrtarët deklarues duhet të dorëzojnë formularin deri në 1 Qershor tek Autoritetet Përgjegjëse, të cilat janë struktura të posaçme për deklarimin e pasurisë në çdo institucion publik.
Më pas, Autoritetet Përgjegjëse kanë afat deri në 15 Qershor për t’i depozituar formularët pranë Inspektoratit të Lartë të Deklarimit dhe Kontrollit të Pasurive.
Institucioni ka edhe një njoftim për subjektet të cilët, gjatë kësaj periudhë izolimi, kanë pasur detyrimin për të deklaruar formularët “para fillimit të detyrës” apo “pas largimit nga funksioni”.
Edhe për këtë kategori subjektesh, ILDKPKI u ka lënë afat deri në 1 Qershor për të dorëzuar formularët e pasurisë pranë Autoriteteve Përgjegjëse të institucioneve ku ushtrojnë detyrën.
Ligji për “Deklarimin e Pasurisë” parashikon që zyrtarët, të cilët emërohen në funksione që mbartin detyrim për deklarim të interesave private, duhet të plotësojnë formularin përkatës brenda 30 ditëve nga emërimi.
Po ashtu, zyrtarët që kanë pasur detyrim për deklarim të pasurisë dhe largohen nga funksionet e tyre, duhet të plotësojnë formularët brenda 15 ditëve nga largimi prej detyrës.
Por, për shkak të pandemisë Covid-19, të gjithë afatet ligjore u shtynë dhe tashmë, ILDKPKI ka caktuar datën e re për dorëzimin e të gjithë formularëve të pasurisë-1 Qershorin.
