Autoritetet në Nju Jork kanë arrestuar 28-vjeçarin Ahmad Khan Rahami si të dyshuar për shpërthimin e së shtunës në mbrëmje në Manhatan.
I dyshuari ra në pranga pas një shkëmbimi zjarri me policinë. Përballja ndodhi në zonën Linden në Nju Xhersi, në afërsi të qytezës Elizabet ku i dyshuari jetonte dhe ku u gjetën pajisje shpërthyese të dielën.
28-vjeçari Rahami me nënshtetësi amerikane, i lindur në Afganistan, ishte identifikuar nga autoritetet vetëm pak orë më parë si i dyshuari për sulmet.
Shpërthimi në lagjen Chelsea lëndoi 29 vetë, të cilët tashmë kanë dalë nga spitali.
Bomba e dytë u zbulua pak kohë pasi shpërtheu e para. Ajo ishte përbëhej nga një tenxhere me presion dhe ishte lidhur me një celular. Policia arriti ta hiqte para se të shpërthente dhe e asgjësoi më pas në një shpërthim të kontrolluar.
Teknikë të FBI-së po analizojnë në një laborator pranë Uashingtonit provat materiale nga dy bombat.
Megjithëse hetuesit deri tani thonë se nuk kanë informacione që të dyshojnë se Rahami është i lidhur me grupet terroriste ndërkombëtare, guvernatori i Nju Jorkut, Endrju Komo, tha se kjo ishte një mundësi.
