Personi që mbeti i plagosur me thikë në Tiranë në vazhdën e një konflikti pranë stadiumit Dinamo, është avokati Alban Bengasi. Ky i fundit ndodhet në spital dhe raportohet se ndodhet jashtë rrezikut për jetën. Së fundmi, Bengasi ka mbrojtur si avokat dy shtetasit turq gylenistë që u arrestuan në Tiranë, Ervin Matën, e të tjerë të pandehur në çështje të bujshme të ndodhura së fundmi.
Policia njoftoi për ngjarjen një ditë më parë, ndërsa bëri me dije se personi që sulmoi avokatin është kunati i tij.
“Shërbimet e Komisariatit të Policisë Nr. 2, pas njoftimit të marrë se në rrugën ‘Emin Duraku’ kishte konflikt mes dy shtetasve, ku një prej tyre kishte goditur me thikë shtetasin tjetër, kanë shkuar menjëherë në adresën e dhënë. Në momentin që shërbimet e Policisë janë afruar në vendin e ngjarjes, shtetasi R.R., 45 vjeç, është larguar me shpejtësi. Në ndjekje të tij janë vënë forca të shumta të Komisariatit të Policisë Nr. 2 dhe pas disa orë ndjekjeje dhe kontrollesh kanë bërë të mundur kapjen e tij. Në përfundim të veprimeve u bë arrestimi i shtetasit R.R., pasi gjatë një konflikti për motive të dobëta goditi me thikë kunatin e tij shtetasi A.B.”, njoftoi policia.
Ndaj autorit, janë ngritur akuzat për veprat penale “Vrasje me dashje” e mbetur në tentativë, “Dhuna në familje” dhe “Mbajtja pa leje e armëve të ftohta”.
