Në atmosferën e nderë që është krijuara mes opinionit publik dhe bluzave të bardha, një gazetar akuzon publikisht një mjeke, ostetër-gjinekologe dhe madje personazh të njohur, për korrupsion. E nga ana tjetër mjekja e quan këtë, shantazh.
Gazetari Mentor Kikia ka reaguar pas indinjatës së krijuar tek mjekët për ndalimin e dy kolegëve të tyre të maternitetit “Koco Gliozheni” të akuzuar për vdekjen e 35-vjecares shtatzënë, 4 ditë më parë. Ai shkruan se nuk mund të bëjnë moral ata që fusin duart në xhepat e qytetarëve. Ai akuzon drejtpërdrejt mjeken Anika Dokle, vajzën e deputetit socialist Namik Dokle se i ka marrë 20 mijë lekë të reja një të afërmi të tij për një operacion të thjeshtë.
“Të paktën ju që fusni duart në xhepat e pacientëve, mos beni moral. Kam ndjekur këto dy ditë zemërimin e shumë njerëzve kundër mjekëve në maternitetin “Koço Gliozheni” për shkak të vdekjes së një një gruaje shtatzënë. Mes atyre të zemëruarve ishte edhe një mjeke e këtij spitali, një grua rebele dhe kritike agresive e qeverisë, Anika Dokle. E kam vlerësuar për kurajën për të thënë të vërtetën me zë të fortë, shpesh edhe pa edukatë, ashtus siç e meritojnë edhe njerëzit dhe koha në të cilën po jetojmë. Por më lë një shije shumë të hidhur kur lexoj rebelimin e kësaj mjekeje. Pak ditë më parë një njeriu im i dha 200 mijë lekë (të vjetra) për një operacion të thjeshtë të nënës. Më pyeti mua për mend: T’i them për para apo jo? Jo- I thashë. Nuk mund të të marrë para ajo. Por meqe e ke merak, thuaja sa për procedurë. Dhe kjo mjekja e bëri procedurën, ia mori paratë edhe duke i numëruar.
Tani ne e dimë se të gjithë bëjnë kështu. Por të paktën ju që fusni duart në xhepat e atyre, që edhe vdesin aty, mos bëni moral”, ka shkruar Kikia.
Pas akuzave të tij ka reaguar menjëherë mjekja Anika Dokle e cila punon në Maternitetin “Koco Gliozheni”. Ajo ironizon gazetarin duke i thënë se gjobëvënia nuk është zanati i saj dhe se nuk shantazhohet.
“Lincimin virtual nga njerëz pa identitet e shpërfill. ‘Baltës’ me emër dhe mbiemër do t’i jap përgjigje atje ku duhet.
Nuk shantazhohem aspak! Gjobëvënia nuk është zanati im”, shkruan Dokle.
