Mbrojtësi i Tiranës, Tefik Osmani është optimist se sezoni 2019-2020 do të mbyllet në fushën e lojës.
Në një lidhje me emisionin “FanZone”, futbollisti veteran i Kategorisë Superiore, foli dhe mbi të ardhmen, ku u shpreh se një ditë edhe ai do t’i “varë këpucët në gozhdë”, por për momentin nuk e ka vendosur, Osmani u shpreh se ndodhet afër presidentit Haili dhe do të pranonte çdo lloj oferte prej tij, për çdo lloj pozicioni pranë këtij klubi.
Besoni se kampionati duhet të rifillojë?
Ne jemi në vend të parë dhe ne na interesohen edhe nëse mbyllet kampionati. Futbolli nuk është aq i rrezikshëm pasi kemi parë njerëz që dalin jashtë. Hapen fasoneri dhe nuk lejohet futbolli e unë mendoj se nuk ka kaq rrezik për ne futbollistët. Ne jemi sportistë dhe nuk dimë të bëjmë presion dhe mendoj se shumë shpejt do të merret një vendim që do të nisë kampionati. Unë kam besim që në fillim të qershorit do të luajmë në fushë.
Keni luajtur me Tiranën dhe Partizanin. Ku jeni ndjerë më mirë dhe keni pasur bashkëpunim më të mirë?
Unë përshtatem me çdo lloj ekipi dhe kam pasur bashkëpunim të mirë në të dy klubet, por te Partizani nuk kishte kaq shumë presion në punë. Ishte një ambient më i qetë atëherë.
A do të riktheheshit te Skënderbeu, nëse do të kishit një ofertë?
Sigurisht që po, pasi unë kam kaluar një kohë shumë të bukur aty. E thashë edhe në fillim, që unë kam kaluar shumë mirë në të gjithë klubet dhe asnjëherë nuk kam tradhtuar, por jam larguar kur kam parë që nuk jam më pjesë e planeve të tyre.
Cili president ka qenë më dorëlëshuar ndaj jush?
Mua të gjithë presidentët më kanë dhënë mjaftueshëm në fakt, por presidenti Halili më ka dhënë edhe dy apartamente.
