A do kthehet opozita në këshillin politik? Kryetari i Grupit parlamentar të LSI-së Petrit Vasili deklaron se ka qenë PS që ka sabotuar aktivitetin e kësaj organizme.
“PS nuk ka asnjë dëshirë të mbyllë reformën zgjedhore që ti japë fund shitblerjes së votës. Veprimtaria e këshillit politik pushoi së vepruari kur nisi pandemia, e mbyllën vetën dhe e sabotuan po vetë. Këta e kanë pezulluar këshillin politik dhe papritmas thonë duan ta mbledhim.”
Në një intervistë për Ora News, me gazetarin Leftion Peristeri, Vasili tha se Gjiknuri po bën ‘telefonin e prishur” me ambasadorët.
“Damian Gjiknuri bën ‘telefon i prishur’ me ambasadorët. Nuk komunikon dot me anëtarët e këshillit politik por komunikon me ambasadoren amerikane. Po çfarë i kërkon asaj, kur gadishmëria është e plotë dhe propozimet e opozitës janë në tavolinë. Gjiknuri nuk ka kërkuar asnjëherë që të mblidhet këshilli politik.
Ne kemi dorëzuar propozimet për ta mbyllur që në 15 mars, po të mos ishte për pandeminë.
“Ne hajde të mblidhemi nesër e pasnesër të miratojmë propozimet dhe hajde të përfundojmë reformën zgjedhore. Në vend të këshillit politik mbledhin komisionin e reformës zgjedhore duan të ndjekin rrugën e faktit të kryer. Ky quhet gangsterizëm politik në funksion të gangsterizimit elektoral.”
