Giuseppe Conte, kryeministri i Italisë, ka folur për mikrofonat e “Il Fatto Quotidiano”, teksa ka ndarë të rejat më të fundit për sa i përket situatës në të cilën ndodhet sporti në Itali.
Në intervistën e zhvilluar, Conte, ka deklaruar se të gjithë palët vendimmarrëse, do të ulen për të gjetur një zgjidhje për të rifilluar futbollin.
“Do të mbledhim botën e sportit dhe të futbollit, së bashku me Ministrin e Sportit, Vincenzo Spadafora, në mënyrë që të ndërmarrim veprime. Do mbajmë shënim kërkesat nga FIGC (Federata Italiane e Futbollit) dhe federatat e tjera, për të pasur parasysh një pamje të përbashkët për rikthimin e aktiviteteve sportive”.
“Ende nuk jam marrë me futbollin, por ne do të dëgjojmë dhe do të gjejmë gjuhën e përbashkët. Ministri i Sportit, Spadafora, ka bërë një punë të shkëlqyer, por është e drejtë që të lejohen të gjithë aktorët e futbollit dhe të sportit të përballen me qeverinë në nivelet më të larta.
Natyrisht duke mbajtur parasysh rekomandimet e Komitetit Shkencor Teknik”, është shprehur Conte.
