Ish-kryeministri Sali Berisha e quan ‘vrasje shtetërore’ vdekjen e 52-vjeçarit Fadil Hoxha, i cili pësoi infarkt ndërsa ishte i arrestuar pë vjedhje të ullinjve nga një bashkëfshatar.
Berisha thotë se policia nuk ka pranuar ilaçet nga të afërmit, çka ka shkaktuar edhe vdekjen e tij. Ai i bën thirrje prokurorisë të vendosë para ligjit autorët e këtij akti.
“Të dashur miq, sot (dje) vdiq nga sëmundje akute zemre në QSUT qytetari Fadil Hoxha 52 vjeç, i cili prej disa ditësh ndodhej i arrestuar në qelitë e komisariatit të Lushnjës me akuzën e një qytetari tjetër se i kishte marrë ullinj. Familjarët e të ndjerit njoftojnë në media se Fadili vuante prej kohësh nga zemra dhe se këtë ja kishin bërë me dije edhe policisë. Familjarët akuzojnë policinë se kjo e fundit nuk i lejoi t’i dërgonin në qeli ilaçet e zemrës Fadilit. Si zakonisht çunat e krimit nuk pranojnë akuzën, e cila është konkrete me datë dhe emra ilaçesh, të cilat nuk u lejuan të futen tek i sëmuri. Këto të dhëna akuzojnë për një vrasje shtetërore nga mohimi i mjekimit jetik për të sëmurin Fadil Hoxha, ndaj i bëj thirrje prokurorisë të vendosë para ligjit autorët e këtij akti të shëmtuar kriminal!”, shkruan Berisha në facebook.
