Luis Figo ka pranuar se aventura e tij te skuadra e Interit ka qenë shumë e vështirë dhe shkak për këtë ishte bërë vetëm Roberto Mancini.
Figo kaloi plot katër sezone te zikaltërit, kohë gjatë të cilës fitoi 4 herë Serinë A, por siç tregon vetë ai, koha e tij te Interi ishte një eksperiencë e keqe. Gjithçka ai e ka zbuluar në një lidhje direkte në “Instagram” së bashku me Fabio Cannavaron, ku ai ka thënë:
“Eksperienca ime te Interi filloi mirë por më pas gjërat me Mancinin shkuan keq. Ai ka qenë personi që më ka poshtëruar më shumë gjatë karrierës sime. Vuajta shumë. Atë kohë nuk isha më 20 vjeç por 34 dhe mendoj se meritoja më shumë respekt.”
“Nuk është se kisha pretendime për më shumë minuta pasi e dija që në atë moshë nuk mund të luaja më titullar. Gjithmonë më nxirrte në nxemje për 85 minuta dhe më aktivizonte 3 minuta vetëm për të parë reagimin tim… kjo gjë nuk është normale.”
