Një ditë më parë, mediat italiane raportuan se ekipi i mjekëve shqiptarë të cilët u dërguan në Itali nga qeveria shqiptare për të kontribuuar në luftën me COVID, u gjobitën. Ministrja e Shëndetësisë Ogerta Manastirulu ka zgjedhur të injorojë faktin dhe të përgëzojë ekipin e mjekëve pas mbërritjes në Atdhe.
Mjekët u gjobitën deri në deri në 500 euro raportoi Gazeta Corriere della Sera, pasi shkelën rregullat e bllokimit në shtetin fqinjë, duke festuar mbarimin e misionit në Breshia, në një nga dhomat e hotelit ku qëndronin. “Ata vendosën të festojnë ditën e fundit të punës dhe kthimin në atdhe me një festë në njërën nga dhomat e hotelit: kjo nuk kaloi pa u vënë re nga pronari i hotelit në Breshia, ku po qëndronte ekipi i mjekëve dhe infermierëve shqiptarë, kështu që brenda pak minutash, forcat e policisë mbërritën në vendin e ngjarjes dhe i gjobitën, pasi disa shfaqën rezistencë”, u raportua në mediat e vendit fqinjë.
Ndërkohë, ministrja e Shëndetësisë ka zgjedhur të injorojë faktin e cilësuar si një skandal, ndërsa shprehet se “ekipi i mjekëve e mbylli misionin me sukses”.
“Krenare për njerëzit punëtorë e fjalëpakë si Qazimi dhe i gjithë ekipi i mjekëve dhe infermierëve shqiptarë që përmbyllën me sukses misionin humanitar në ndihmë të popullit mik Italian”, shkruan Manastirliu në një postim në rrjetin social FB, ku publikon dhe disa foto nga mbërritja e ekipit ‘qeflinj’ të mjekëve në aeroportin “Nënë Tereza”.
Nuk kanë munguar megjithatë qytetarë, që përmes komenteve në postimin e bërë nga ministrja, i kujtuan episodin e pakëndshëm për imazhin e vendit.
