Krizë te Tirana, me të rinjtë ndaj Vllaznisë

Sikur të mos mjaftonte kriza e rezultateve apo ajo e marrëdhënieve mes klubit dhe tifozëve, Tirana duhet të përballet me një tjetër problem gjithmonë në rritje, sa i përket mungesave të shumta në kontigjent. Pikërisht para transfertës ndaj Vllaznisë, bardheblutë janë ndeshur me një surprizë negative, teksa mbrojtësi serb, Dejan Karan ka pësuar një dëmtim në shpinë, mjaftueshëm të rëndë, sa për ta lënë atë jashtë grumbullimit. Dejan Karan nuk do të luajë ndaj Vllaznisë për shkak të një dëmtimi në shpinë. Lajmin e kanë bërë të ditur vetë zyrtarët bardheblu, të cilët kanë njoftuar se për shkak të dëmtimit, futbollisti serb nuk ka asnjë shans që të aktivizohet nesër në përballjen ndaj Vllaznisë, e vlefshme për javën e 26-të të kampionatit. Mungesa e Karan konsiderohet më shumë se e pakëndshme për stafin teknik të bardhebluve, të cilët tashmë numërojnë plot katër mungesa kryesore në fazën difensive, ku për nesër nuk do të jenë të gatshëm Bulku, Muça, Teqja dhe Karan. Në kushte emergjence, trajneri Ilir Daja ka grumbulluar nga ekipi i të rinjve Berishën, Jotin, Deliajn dhe Halilin.