Rio Ferdinand ka rikujtuar kohën kur së bashku me Nemanja Vidiç kishin formuar një dyshe të “pakalueshme” për kundërshtarët.
Ish-mbrojtësi legjendar i Manchester United, gjithashtu ka folur edhe për vështirësitë që haste serbi në markimin e sulmuesit spanjoll, Fernando Torres.
“Së pari dua të them se unë dhe Vida jemi dyshja e mbrojtjes më e mirë në të gjithë historinë e Premier League. Më besoni sulmuesit luanin nëpër krahë sepse nuk donin të përballeshin me ne në qendër të mbrojtjes. Ishte çmenduri”.
“Për sa i përket duelit Torres-Vidiç, gjithmonë do të jetë një lojtar gjatë karrierës suaj me të cilin do të keni vështirësi në markim. Ai mund të mos jetë lojtari më i mirë në planet, por stili i tij është bërë për të dëmtuar stilin tuaj. Dhe Torres ka qenë ashtu për Vidiç”.
“Vidiç duhej të përballej me të dhe vërtetë kishte vështirësi. Madje në dy raste duhej të përjashtohej për shkak se ishte e vështirë ta ndaloje. Ishte i vetmi lojtar në botë që Vidiç nuk arrinte t’i gjente ilaçin”.
“Por dëgjoni Torres ka qenë sulmues i madh kur ishte te Liverpooli, ka qenë shkatërrues, po mua me thënë të drejtën nuk më ka shkaktuar probleme”.
