Ministrja e Financave, Anila Denaj, tha mbrëmjen e sotme në emisionin Opinion, se nuk ka asnjë diskutim konkret lidhur me propozime për rishikime pagash dhe pensionesh, sikundër ka propozuar deputeti Ilir Beqja.
“Ne do të jemi shumë të kujdesshëm në rastin e rishikimit të pagave, mund të them se disa paga janë prekur, sikundër ato të zyrtarëve të lartë.
Ne duhet të shikojmë jo vetëm për dy apo tre muaj por për disa muaj. Deri tani nuk ka asnjë ide lidhur me një propozim të tillë. Ne do të shikojmë ku jemi me të ardhurat dhe ku jemi me shpenzimet. Pagat nuk përfshihen te shpenzimet e para, por gjithçka do të jetë në varësi të të ardhurave dhe kohës”, tha Denaj.
Lidhur me rritjen ekonomike, Denaj tha se ulja e të ardhurave mund të jetë me minus 4.5 % të Produktit të Brendshëm
Bruto, një rritje të defiçitit, por gjithçka do të varet nga shpenzimet.
“Projektet e rindërtimit nuk do të anulohen, sepse këto janë një mundësi për të larguar njerëzit nga çadrat por edhe për të punësuar njerëz.
Projekte të reja janë vetëm 6 mld lekë, që shkojnë për digat dhe urat. Ne shkojmë te zërat e shpenzimeve, përfshi edhe te PPP-të, për të cilat mund të negociohen për tu shtyrë. Gjithashtu do të negociohen shpenzimet të tjera siç janë udhëtimet, dietat etj.
Kontratat e PPP do të negociohen, në rastet kur nuk materializohen. Gjithashtu do të shikojmë kontratat e inceneratorëve dhe rrugëve”, tha Denaj.
