Një person është qëlluar me thikë brenda një Fast Food-i në kryeqytet. Policia e Tiranës bëri me dije këtë të martë se i lënduari është transportuar në spital jashtë rrezikut për jetën, ndërsa dy autorët janë vënë në pranga: Reis Osmërija, 21 vjeç dhe Alban Gaçi, 27 vjeç.
Ngjarja
Burime zyrtare njoftuan se: Shërbimet e Komisariatit të Policisë Nr. 2, pas njoftimit të marrë se në një ambient Fast Food-i, në rrugën “Myslim Shyri”, po ndodhte një konflikt mes disa personave, menjëherë kanë shkuar në adresën e dhënë. 21 vjeçari dhe 27 vjeçari kishin hyrë në ambientet e një Fast Food-i, në rrugën “Myslym Shyri”. Aty po konfliktoheshin me shtetasin Renato Shaulli 23 vjeç, duke e goditur me thikë disa herë në trup. Ndërhyrja e Policisë parandaloi përshkallëzimin e mëtejshëm të konfliktit. I plagosuri ndodhet në spital nën kujdesin e mjekëve.
Policia njoftoi zyrtarisht se konflikti ndodhi “për motive të dobëta”.
Akuzat
Në cilësinë e provës materiale, grupi hetimor sekuestroi një armë të ftohtë thikë, me të cilën autorët kryen plagosjen. Në përfundim të veprimeve, nga specialistët e Hetimit të Krimit u bë arrestimi në flagrancë i shtetasve Reis Osmërija dhe Alban Gaçi për veprat penale “Vrasje me dashje, e mbetur në tentativë, kryer në bashkëpunim” dhe “Mbajtja pa leje e armëve të ftohta”. “Materialet e para hetimore i kalojnë Prokurorisë Pranë Gjykatës së Shkallës së Parë Tiranë, për hetime të mëtejshme”, njoftoi policia.
