Gjykata e Korçës ka caktuar masën e sigurisë “arrest me burg” për 65 vjeçarin Apostol Bozhgolli.
Ai u vu në pranga, pasi mbrëmjen e 23 prillit dyshohet si autor i vrasje me thikë të fqinjit të tij, 67-vjeçarit Perikli (Petrika) Treska.
Avokati i tij u shpreh jashtë gjykatës se autori i ngjarjes ka mohuar autorësinë e ngjarjes, ndërkohë që pritet që nga hetimi të arrihet në një përfundim mbi atë që ka ndodhur.
Ata jetonin të dy në një pallat dhe shkaku i konfliktit dyshohet të ketë qenë drita e shkallës së pallatit.
Mësohet se pasi janë zënë verbalisht, situata ka degjeneruar deri në përdorimin e thikës, ku viktima mori 9 thika, 5 në kurriz, 3 në gjoks, 1 në zemër.
Perikli (Petrika) Treska ishte një punonjës i Postës Shqiptare dhe nuk cilësohej si problematik. Burime bëjnë me dije se Apostol Bozhgolli dyshohet për çrregullime mendore.
Viktima u gjet në derën e banesës nga bashkëshortja e tij.
