Zlatan Ibrahimovic është në Suedi, ku vazhdon të stërvitet me Hammarby, një klub, në të cilin është bashkëpronar. Sot ai ka luajtur një ndeshje miqësore, ku ka shënuar në stilin e tij klasik. Në fund të lojës, ai foli për mediat suedeze të pranisheme. Tema kryesore ishte e ardhmja e tij dhe pasiguria e vazhdimit të karrierës te Milani, klub me të cilën kontrata do t’i skadojë më 30 qershor:
“Unë kam një kontratë me Milanin, që do ta respektoj deri në fund, pastaj le të shohim. Dua të luaj futboll, mendoj se të gjithë në një ekip duhet të kenë mundësinë të japin kontributin e tyre. Do të shohim se çfarë do të ndodhë. Më duhet të respektoj marrëveshjen që kam nënshkruar. Sot jam 38 vjeç, nuk e di sa do të zgjasë, para se të gjej një zgjidhje”.
Ibrahimovic nuk e përjashtoi mundësinë e ndërhyrjes së tij ekonomike për të financuar blerjet e Hammarby: “Po, kjo do të varet nga situata”. Një mendim edhe për vandalët, që e shkatërruan praktikisht statujën e tij në Malmoe:
“Unë mendoj se është për të ardhur keq, një gjest nga ata, që duan të tërheqin vëmendjen e mediave. Është një veprim vërtet fëmijëror. Ne nuk i përkasim këtij niveli, jemi më të mirë. Vetëm pse statuja nuk është më, kjo nuk do të thotë që historia ime është shkatërruar. Ajo do të mbetet përgjithmonë”.
