Një efektiv policie në Korçë është qëlluar me thikë dhe ka mbetur i plagosur, jashtë rrezikut për jetën. Autori është vënë në pranga, ndërsa i lënduari po merr mjekim në spital. Efektivi i Rendit Spartak Zotka nuk ka qenë në shërbim kur ka ndodhur ngjarja.
Dyshohet se shkak i plagosjes ëshë bërë një gjobë që efektivi i ka vendosur autorit të plagosjes pasi sipas policisë, para disa ditësh është konstatuar duke lëvizur si këmbësor pa autorizimin përkatës.
“Mesditën e sotme, pranë ‘Kullës Red’ në Korçë, shtetasi I. F., 48 vjeç, dyshohet se për shkak të detyrës, ka plagosur me mjet prerës punonjësin e Komisariatit të Policisë Korçë S. Z., i cili ka qenë jashtë shërbimit dhe më pas është larguar nga vendngjarja. Falë reagimit të shpejtë të Policisë dhe mirëorganizimit të veprimeve u bë e mundur kapja dhe arrestimi në flagrancë i autorit të dyshuar të ngjarjes, i cili aktualisht ndodhet në ambientet e Komisariatit. Ngjarja dyshohet të ketë ndodhur për shkak të detyrës, pasi 48-vjeçari, para disa ditësh është konstatuar duke lëvizur si këmbësor pa autorizimin përkatës dhe është ndëshkuar me masë administrative, nga punonjësi i policisë. Në cilësinë e provës materiale iu gjet e sekuestrua një mjet prerës (thikë)”, njoftoi policia.
Mbrëmjen e djeshme po në Korçë, fqinji vrau pas sherrit për dritën e shkallës një 67-vjeçar.
