39 raste të reja me COVID-19 janë zbuluar në Kosovë në 24 orët e fundit, nga 255 teste të realizuara.
Lajmi u bë publik nga Instituti Kombëtar i Shëndetësisë Publike në Kosovë, ku konfirmoi se ka arritur në 669 numri total i të infektuarëve në vend.
39 rastet e reja janë raste kontakti, njëzet e gjashtë raste nga komuna e Pejës, nëntë raste me vendbanim në Prizren, dy raste me vendbanim në Mitrovicën e Veriut dhe me nga një rast vendbanimet: Kërninë-Istog dhe Zveçan.
IKShPK njofton se numri i madh i rasteve të konfirmuara në Pejë janë si pasojë e pjesëmarrjes në një ceremonial mortor më 6 prill 2020, përkundër masave të ndalimit të grumbullimit në masë të qytetarëve.
Ndërkohë në 24 orët e fundit, ka ndërruar jetë dhe një tjetër person nga COVID-19, duke e çuar në 19 numrin në total të viktimave në Kosovë.
Viktima e fundit është një 53 vjeçar me vendbanim në Prizren dhe i konfirmuar me COVID-19 me datë 10 prill. Pacienti ishte hospitalizuar në Klinikën Infektive pas tre ditësh në gjendje të rënduar dhe në përkujdesje Intensive. Te i sëmuri gjatë ecurisë së sëmundjes janë zhvilluar ndërlikime si pasojë e COVID-19.
Ndërkohë në Kosovë, gjatë 24 orëve të fundit kanë fituar betejën me COVID-19 edhe 21 pacientë të tjerë, duke e çuar në 159 numrin në total të të shëruarëve në vend.
