Këshilli bashkiak i Durrësit ka zhvilluar një mbledhje emergjence me mjetet e komunikimit elektronik, ku ka miratuar caktimin e Emirjana Sakos, për kryerjen e funksioneve të kryetarit të kësaj bashkie për shkak të dorëheqjes nga funksionet të Zhuljen Varfaj.
Emirjana Sako u propozua nga dy grupet e këshillit bashkiak dhe u miratua me unanimitet.
Përmes një shkrese të publikuar më herët gjatë ditës, Zhuljen Varfaj, kryetari i komanduar i Bashkisë së Durrësit njoftoi dorëheqjen për arsye shëndetësore.
Varfaj shpjegoi se për arsye shëndetësore largohet nga detyra e Kryetarit të Komanduar.
“Sot me dt 23.04.2020, unë Zhuljen Ago Varfaj, me detyrë Zëvendës Kryetar i Bashkisë Durrës dhe që prej datës 1 dhjetor 2019, i komanduar me vendim të Këshillit Bashkiak Durrës, për të ushtruar detyrat si dhe funksionet e Kryetarit të Bashkisë së Durrësit, i gjendur para një situate krejtësisht të pafavorshme, madje me rrezik të shtuar për shëndetin tim, parashtroj dhe jap dorëheqjen time të parevokueshme nga detyra dhe funksionet e ngarkuara”,- njofton Varfaj.
“Do të dëshiroja të falenderoja dhe të vlerësoja me mirënjohje Këshillin Bashkiak të Durrësit, për besimin dhe mbështetjen e dhënë nga çdo anëtar i tij, bashkëpunëtorët e mi përgjatë këtyre viteve në administratën e Bashkisë Durrës,të cilët në këtë periudhë të vështirësive të mëdha për Durrësin kanë dhënë dhe bërë më të mirën e tyre në zgjidhjen e shumë problematikave dhe kërkesave të qytetarëve të Durrësit”,– përfundon Varfaj shkresën e tij.
