Tirana / Turpi i rradhës nga drejtuesit, reagojnë tifozët

Vetëm pak ditë më parë, pikërisht në ndeshjen e mesjavës, më të unifikuar se kurrë, tifozëria bardheblu, bojkotoi skuadrën e Tiranës, teksa nuk hyri në stadium për të ndjekur ndeshjen ndaj Flamurtarit, në shenjë proteste ndaj rezultateve të dobëta, keqmenaxhimit të ekipit dhe premtimeve të pambajtura të drejtuesve. Një bojkot i shoqëruar me një protestë para stadiumit “Selman Stërmasi” nën moton “Afër Tironës, larg mashtrimeve”, që bëri jehonë në të gjithë opionin publik, por duke u anashkaluar totalisht nga vetë ata të cilëve i adresohej ky aktivitet. Tifozët bardheblu bojkotuan ndeshjen Tirana-Flamurtari, për të protestuar ndaj mashtrimeve të klubit. Sikur të mos mjaftonte reagimi i munugar apo qoftë edhe një përpjekje sado e vogël apo e shtirur për autokritikë, nga ato që zakonisht drejtuesit bardheblu nxitojnë të bëjnë sa herë ekipi dështon dhe premtimet nuk mbahen, apo akoma më keq, kur gjithçka bëhet në të kundërt të asaj që zotohet, kësaj here krerët e klubit më të titulluar në Shqipëri kanë dështuar edhe më rëndë. Interesimit të tifozërisë për informacion mbi çmimin dhe numrin e biletave në dispozicion për ndeshjen në transfertë ndaj Vllaznisë, klubi iu përgjigj me indiferentizëm total, të paktën sipas vetë tifogrupit “Tirona Fanatics”. Ky i fundit, duke e konsideruar të turpshme këtë strategji të drejtuesve, nuk ka vonuar të reagojë publikisht. “INFORMIM! Pas fshehjes ndaj opinionit nga ana e klubit në lidhje me reagimin e tifozerisë gjatë ndeshjes me Flamurtarin në mesjavë, vjen edhe tentativa e rradhës për të mbajtur larg skuadrës tifozat. Ndiejmë detyrimin të njoftojmë antarët dhe të gjithë tifozat bardheblu, se interesimit tonë për informacion mbi çmimin dhe numrin e biletave në dispozicion për ndeshjen e rradhës në transfertë, me paturpësi, klubi iu përgjigj me indiferentizëm total. I bëjmë me dije klubit dhe opinionit, se reagimi i Tirona Fanatics do të vazhdojë me moton: Afër Tironës, larg paturpsisë! T.F. ’06”, deklaroi tifogrupi “Tirona Fanatics” në “facebook”.