Policia e Durrësit ka konfirmuar lajmin që dha deputeti i PD-së Flamur Noka gjatë seancës parlamentare se një avion i vogël është ulur sot në fshatin Gotull në kufirin mes Krujës dhe Laçit. Sipas njoftimit të policisë rreth orës 08:45 është lajmëruar se një avion pa bërë ulje.
Sipas policisë avioni drejtohej nga një pilot italian dhe ka bërë ulje të detyruar për shkak të një defekti teknik. Ai është Guido Andrea Guidi, 69 vjeç.
“Mes Ishmit dhe Lacit konfirmohet rënia e një avioni të vogël. Sipas njoftimit në sallën operative, piloti është italian dhe avioni është gjetur bosh. Po verifikohet nëse ka qenë bosh apo e kanë boshatisur para se të mbërrinte policia”, thanë burimet policore.
Ka qenë një banor i zonës që ka njoftuar policinë e cila ka shkuar në vendin e ngjarjes me shërbimin antidrogë, dhe është njoftuar edhe Prokuroria. Theksojmë se ka qenë ora 8:45 e mëngjesit kur u njoftua policia. Piloti italian është i pajisur me dokumentacion të rregullt teksa nga kulla e aviacionit mësohet se ajo s’ka pasur dijeni për këtë fluturim në hapësirën ajrore shqiptare.
NJOFTIMI I PLOTE ZYRTAR I POLICISE:
Rreth orës 08:45, Policia e Durrësit ka marrë një njoftim se në fshatin Gotull, Njësia Administrative Ishëm është parë të ulet një avion i përmasave të vogla.
Menjëherë është shkuar në vendin e ngjarjes ku është konstatuar i dëmtuar gjatë uljes një avion i përmasave të vogla, ndërsa Piloti nuk kishte pesuar lëndime gjatë uljes. Piloti i avionit është një shtetas italin, Guido Andrea Guidi, 69 vjeç. Në shpjegimet e para që jep ky shtetas thotë se është ngritur nga Bari dhe ka dashur të bëjë një udhëtim me destinacion veriun e Italisë. Për shkak të kohës së bukur ka vendsour të kryejë një fluturim mbi det. Në lartësinë 4 000¬5 000 këmbë ky shtetas deklaron se i ka dhënë defekt avioni. Ka parë nga lartësia një tokë arë të punuar, të cilën e ka konsideruar vendin më të përshtatshëm për t’u ulur. Është përpjekur të ulet dhe gjatë uljes avioni ka pësuar dëmtime. Piloti është shoqëruar në Spitalin Rajonal Durrës për një kontroll mjekësor, megjithëse nuk ka pësuar dëmtime. Është njoftuar Prokurori i gatshëm. Gjate kontrollit në brendësi të avionit nuk është gjetur asnjë send i kundraligjshëm. Të gjitha Shërbimet kanë kryer krehjen e vendit ku është gjetur avioni dhe zonës përrreth. Policia po punon për zbardhjen e plotë të rrethanave e rastit në fjalë.
