Performancat e Achraf Hakimi me Borussia Dortmund, kanë bërë që ai të bëhet më i vlerësuar te Real Madrid, ku është nën kontratë deri më 30 qershor 2023.
Dortmundi tashmë ja ka bërë të qartë Real Madrid-it, se ata dëshirojnë që lojtari të vazhdojë të luajë në Gjermani edhe për një sezon tjetër, por gjithçka do të vendoset nga “Los Blancos”.
Në ambientet e klubit “Mbretëror” aktualisht janë duke studiuar situatën e tyre dhe skuadrën, ndërsa po konsiderojnë se cilët nga lojtarët e tyre do të vendosen në merkaton e transferimeve pasi gjithçka të kthehet në normalitet dhe futbolli të ri-startojë.
Achraf ka thënë në disa raste se dëshiron të kthehet te Real Madrid, klub që ai konsideron si shtëpinë e tij. Ai është gjithashtu i qartë në lidhje me dëshirën për të luajtur, dhe prania e Dani Carvajal në kryeqytet e ndërlikon disi atë.
Para se të nisej drejt Dortmundit, me Real Madrid ai bëri 17 paraqitje, ndërsa me verdhezinjtë ai ka zhvilluar 65 herë ndeshje, duke shënuar 10 gola dhe asistuar 17.
Shifra këto që vështirë të anashkalohen nga madrilenët, por nëse duan të rikthejnë futbollistin në kryeqytetin spanjoll, atëherë me siguri 21-vjeçari do të kërkojë minuta në dispozicion.
