Coronavirusi nuk po jep shenja ngadalësimi, por bota e futbollit nuk i humbur shpresat për të shpëtuar atë çfarë ka mbetur nga sezoni aktual.
Në një intervistë të fundit, presidenti i UEFA-s, Aleksandër Ceferin, ka përsëritur qëndrimin e tij që sezoni aktual duhet të përfundojë pasi në të kundërt pasojat do të ishin të mëdha. Ceferin pret lejen nga autoritetet për të rinisur gjithçka, madje edhe pa tifozë.
“Prioriteti kryesor është shëndeti i tifozëve, lojtarëve dhe drejtuesve. Unë jam një natyrë optimiste, besoj se ka mundësi të rinisemi dhe t’i mbyllim kampionatet e kompeticionet evropiane. Pezullimi i këtij sezoni do të kishte një impakt të tmerrshëm për klubet dhe ligat përkatëse”.
“Ne mund të përfundojmë sezonin, por duhet të respektojmë vendimet e autoriteteve dhe të presim leje për t’u rikthyer në fushë. Tifozët? Mund të na duhet ta bëjmë pa praninë e tifozëve, por rëndësi ka të zhvillohen ndeshjet. Është më mirë të luajmë pa spektatorë sesa të mos e bëjmë fare”.
“Rifillimi i futbollit mund t’u sjellë njerëzve lumturi, gëzim dhe një sens normaliteti në këto kohë të vështira, kanë shumë nevojë për diçka të tillë. Nuk ka asnjë afat për finalet e kupave evropiane. Gjithçka varet se kur do fillojmë të luajmë përsëri”, përfundon Ceferin.
