Ish-shef i Antiterrorit në Lezhë, Skënder Seferi, do të vuajë një dënim prej 5 vitesh burg për shkak të vrasjes së një adoleshenti nga pakujdesia.
Gjykata e Apelit në Shkodër ka lënë në fuqi vendimin e Gjykatës së Shkallës së Parë.
Ngjarja ka ndodhur në korrik të vitit 2010 në Urën e Cenit në Lezhë. Seferi hapi zjarr pasi makina e drejtuar nga Ardit Skandaj çau postbllokun e policisë.
Nga plumbat mbeti i vrarë vëllai i Skandajt që po ndiqej nga policia për shkak se kishte grabitur disa turistë nga Mali i Zi.
Armando Skandaj, 15 vjeç, që ishte i ulur në sediljen e pasme të makinës mbeti i vdekur. Prokuroria hapi dosje për ngjarjen katër vite pas vrasjes.
