Është zbardhur dëshmia e Ilir Selmanit para grupit hetimor, i cili u arrestua dje në zonën e Xhamllikut, në Tiranë.
Selmani dyshohet si një ndër autorët e ekzekutimit mafioz të ish-efektivit Santiago Malko.
Mësohet se ai ka mohuar të ketë lidhje me vrasjen, teksa ka thënë se nuk e njihte fare Santiago Malkon, por e kishte parë vetëm në televizor.
Ai ka deklaruar se i rrezikohej jeta nga kundërshtarët e tij dhe të Leonard Dukës, me të cilin, ka thënë se ka një lidhje miqësore shumë vjeçare, dhe sipas tij kjo ishte arsyeja pse dilte i armatosur në rrugë.
“Me leonard duken kam lidhje miqesie shume vjecare. Nuk e kam takuar prej shume muajsh dhe nuk kam informacion per vrasjen e Santiago Malkos. Nuk e njoh fare, e kam pare vetem ne televizor qe flitej per te. Prej muajsh kam qendruar i fshehur dhe rralle kur dilja levizja i armatosur, sepse me rrezikohet jeta nga kundershtaret e mi dhe te Leonardit. Me kane thene se Ervis Martini do te me heqe qafe”, mësohet të ketë thënë Selmani para policëve.
Selmani kishte marrë një banesë me qira në zonën e Xhamllikut, ku fshihej prej disa kohësh dhe qëndronte në hyrjen e fundit të pallatit e cila kishte dalje në tarracë. Ai u kap dje jashtë banesës së tij, në sheshin para pallatit.
Zona është mbajtur në vëzhgim nga agjentë të policisë dhe për lokalizimin e Selmanit kanë ndihmuar lëvizjet e bashkëshortes së tij, e cila shkonte e takonte.
Selmani dyshohet se mori pjesë në ekzekutimin e Santiago Malkos, i njohur si njeri i besuar i Vis Martinajt, duke drejtuar njërën prej makinave që bënë ndjekjen e tij, ndërsa më pas është kapur nga kamerat e sigurisë duke mbledhur bishtat e cigareve të konsumuara nga Blendi Teta.
