Për herë të parë kryeministri Edi Rama deklaroi se ka 3 skenarë që qeveria po diskuton për hapjen e ekonomisë dhe bizneseve. Në një intervistë për emisionin “Opinion”, Rama tha se do të pritet fillimisht hyrja në fuqi e ndryshimeve në Kodin Penal, ku parashikohen ndëshkimet për shkelësit e karantinës dhe do të ketë lehtësim për një sërë biznesesh që konsiderohen me risk të ulët.
Rama tha se javën e ardhshme do të bëhen përgatitjet dhe do të përcaktohen protokollet e sigurisë për çdo rast. Të tjera biznese janë konsideruar me risk të mesëm, por për to do të shihet si do të jenë shifrat në muajin Maj.
Rama tha se ende nuk është vendosur se çfarë do të behet me qendrat estetike dhe klinikat dentare ndërsa renditi edhe bizneset me risk të lartë.
Sa i takon hapjes së kufijve do të shihet praktika që do të ndjekin vendet e tjera ndërsa sqaroi qendrat evropiane nga do të ketë riatdhesime.
Kreu i qeverisë tha se të gjitha lehtësimet e lëvizjes do të jenë në varësi të shifrave të infektimit.
