Presidenti francez, François Hollande përjashtoi sot lëshimin më të vogël ndaj Turqisë mbi të Drejtat e Njeriut apo liberalizimin e vizave për shtetasit e saj në Bashkimin Evropian në këmbim të garancive mbi kontrollin e fluksit migrator.
“Nuk duhet të ketë asnjë lëshim në çështjet e të Drejtave të Njeriut apo mbi kriteret e liberalizimit të vizave”, deklaroi ai për median.
“Madje ne duhet të përpiqemi që, në kontekstin që njohim, ky të jetë një faktor sqarimi dhe transparence në marrëdhëniet mes Turqisë dhe Evropës”, shtoi ai.
Presidenti francez i mbajti këto deklarata në përfundim të një mbledhje në pallatin presidencial “Elysée” me 15 krerë socialdemokratë evropianë.
