Leroy Sane është gjithmonë e më pranë firmës me Bayern Munich. Sulmuesi i Man.City-t prej kohësh është vënë në shënjestrën e bavarezëve, të cilët pas largimit të dyshes Ribery-Robben kërkojnë të forcojnë krahët e sulmit.
Kështu gazeta britanike “The Mirror”, raporton se përfaqësuesit e Leroy Sanes i kanë intensifikuar tentimet për t’ia siguruar sulmuesit anësor gjerman një kthim në vendlindjen e tij, pas katër vjetëve në Premierligë me “Qytetarët”.
Bayerni është gati t’i ofrojë rreth 70 milionë paundë për Sanen, gjysmën e shumës që Manchester City e kërkonte gjatë afatit kalimtar të verës së kaluar, por tani që 24-vjeçari pësoi një dëmtim të rëndë çmimi i tij ka rënë ndjeshëm.
Tani që i ka mbetur vetëm edhe një vit në kontratën e tij dhe pasi që Sane ka refuzuar të rinovojë, Manchester City do të duhet ta shesë atë këtë verë ose ta humbasë me parametra zero verën e ardhshme.
