Pasi ndaloi shitjet, Samsung heq nga tregu Galaxy Note 7. Kompania koreanojugore, numri një në botë për smartphone-t, ka publikuar lajmin në uebin e saj, duke u kërkuar të gjithë klientëve në të gjithë botën që të ndalojnë të përdorin “menjëherë” modelin Galaxy Note 7 dhe që ta dërgojnë në dyqane për ta zëvendësuar me një celular tjetër sa më shpejt të jetë e mundur.
Galaxy Note 7 duhej të ishte arma e Samsung për të sfiduar edhe njëherë Apple. Gjithë e llogaritur në detajet më të vogla. U prezantua më 2 gusht, një muaj përpara iPhone 7, që erdhi në 7 shtator. Por diçka nuk funksionoi: bateria, në disa rrethana, mund të nxehet dhe të shpërthejë.
Janë raportuar të paktën 35 raste të nxehjes së baterisë dhe shpërthim të pajisjes. Deri më tani, numri dyshohet të ketë shkuar në 70 dhe në mjaft raste, përdoruesit kanë përfunduar edhe me djegie.
