Sulmuesi i Partizanit, Erald Çinari, së fundmi ka dhënë një intervistë për emisionin “Fan Zone” në Supersport.
Lojtari shkodran, që në dy vitet e fundit është kthyer në një futbollist mjaft të rëndësishëm për “Të Kuqtë”, foli për situatën rreth coronavirusit, ndërsa është ndalur edhe në një nga momentet më kontroverse në karrierën e tij, largimin nga Vllaznia dhe mosmarrëveshja me drejtuesit e klubit.
Situata e coronavirusit në Shkodër- “Gjendja në Shkodër është shumë e keqe, shtohen rastet çdo ditë. Një neglizhencë nga të gjithë që nuk qëndrojnë në shtëpi. Po më mungon çdo gjë, duke filluar nga stërvitja, ndeshjet dhe tifozët. Na mungon zhurma e njerëzve që bërtisnin në shkallët e stadiumit”.
Gjendja fizike- “Gjendja fizike nuk diskutohet. Nuk është njëlloj të punosh veç, si me grupin. Tani po rëndohemi edhe psikologjikisht, nuk po na mban as truri(qesh). Tani kam nis t’u bëhem rëndë nënës e babës. Kur po ikën thonë (qesh)”.
Largimi nga Vllaznia- “Nuk e lashë Vllazninë as për lek as për famë. Unë u nisa për në Kroaci, kisha arritur një marrëveshje me klubin kroat, por nuk u dha leja e kalimit. Çinari nuk e ka me Vllazninë por me drejtuesit, te cilët nuk vendosën ta kthejnë te Vllaznia, por më lanë te Partizani. Megjithatë jam shumë i lumtur te ky ekip.”, u shpreh Çinari për Supersport.
