Rikthimi në jetën normale do të jetë gradual dhe me faza. Kështu u shpreh Kryeministri I Greqisë Kyriakos Mitsotakis në një mesazh drejtuar kombit. Kreu i qeverisë falënderoi qytetarët për respektimin e masave kufizuese të zbatuara gjatë pesë javëve të fundit për të frenuar përhapjen e coronavirusit.
“Lufta ende nuk është fituar” tha ai, duke shtuar se grekët kanë duruar sakrifica me një ndjenjë të lartë të përgjegjësisë. Mitsotakis gjithashtu paralajmëroi një sistem të ri kombëtar të kujdesit shëndetësor, duke u zotuar të shtojë qindra shtretër në spitale që të afrohen me shpejtësi me mesataren evropiane dhe të përgatisin vendin për dimrin e ardhshëm kur virusi “ka shumë mundësi të kthehet”.
Ai tha se përfitimi më i madh nga kjo krizë e paprecedentë “do të jetë besimi ndaj shtetit dhe qeverisë”.
Duke u ndalur tek ekonomia, Kryeministri i Greqisë, Kyriakos Mitsotakis paralajmëroi se recesioni në vitin 2020 do të jetë i thellë”, por edhe rimëkëmbja në 2021 mund të jetë “edhe më e vështirë”.
Plani ekonomik i qeverise greke parashikon 24 miliardë eurosh, nga të cilat 14 miliardë financohen nga buxheti i shtetit grek kurse 10 miliardë nga BE.
Ndër të tjera kryeministri bëri me dije se do të aktivizohet një ndihmë financiare emergjente prej 400 eurosh për 155.000 të papunët afatgjatë në Greqi. Tashmë, 750,000 punëtorë që nuk po vijojnë punën e tyre marrin shumën prej 800 eurosh.
Fatmirësisht Greqia nuk është duke përjetuar një situatë të vështirë sikundër shumë shtete evropiane si Italia, Spanja apo Franca. Në shtetin fqinj këtë të hënë u raportua për 30 raste të reja me COVID-19 duke e çuar në 2145 numrin total të të infektuarve, ndërsa 90 persona kanë humbur jetën.
