Një të arrestuar, një të proceduar penalisht si dhe ndëshkimin e 16 drejtues mjetesh, 253 shtetas dhe 2 administratorësh lokalesh.
Ky është bilanci i 24 orëve të fundit për ndëshkimet e policisë në zbatim të masave kufizuese për vënien në kontroll të pasojave që sjellin përhapjen e COVID-19.
Në Tiranë është prangosur shtetasi E. I., pasi gjatë mbrëmjes së djeshme është konstatuar duke lëvizur me këmbë dhe ka kundërshtuar me dhunë punonjësin e Policisë në detyrë, duke e goditur me sende të forta.
Ndërsa në Korçë është proceduar penalisht shtetasi O. A., banues në Lushnjë, pasi, për shkak të detyrës, nuk i është bindur urdhrit të policisë për ta shoqëruar në Korçë, për t’u karantinuar në hotelin nga i cili ishte larguar.Ky shtetas është karantinuar në hotel për shkak se kishte ardhur nga jashtë.
Burime zyrtare bëjnë me dije se 16 drejtues mjetesh janë ndëshkuar me heqje të lejes së drejtimit dhe bllokim mjeti, pasi kanë shkelur urdhrin e ndalim qarkullimit. Ndërsa 253 shtetas janë konstatuar duke lëvizur me këmbë apo me biçikleta, pa ndonjë arsye apo emergjencë dhe janë gjobitur me 10.000 lekë.
Në të gjithë vendin janë konstatuar 2 lokale të hapura dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Policia e Shtetit apelon për të gjithë qytetarët që të respektojnë masat kufizuese, për të bërë të mundur parandalimin e përhapjes së COVID-19.
