Teksa në fillim të këtij muaji ka hyrë në fuqi ligji për dhënien e lejeve të ndërtimit online, jo të gjithë bashkitë kanë të drejtë të japin leje. Shumica e njësive vendore nuk ka të drejtë të japin leje pasi për to ende nuk janë miratuar planet rregulluese.
Aktualisht vetëm 14 njësi kanë plane të përgjithshme vendore të miratuara. Ato janë Bashkitë e Himarës, Lushnjës, Beratit, Kamzës, Tiranës, Fierit, Vorës, Mamurrasit, Durrësit, Shkodrës, Rrogozhinës, Fushë-Krujës, Bulqizës dhe Korçës.
Këto Bashki mund të vijojnë normalisht me shqyrtimin dhe dhënien e lejeve të ndërtimit, në përputhje me planet vendore përkatëse, për territoret administrative bashkiake përpara reformës territoriale. Në të gjitha zonat e tjera të vendit, deri në miratimin e planeve të përgjithshme vendore në proces hartimi, Bashkitë mund të vijojnë me dhënien e lejeve të ndërtimit për të gjitha objektet e parashikuara në Vendimin nr. 1, datë 30.07.2015 të Këshillit Kombëtar të Territorit duke respektuar kufijtë e zonave të urbanizuara të përcaktuara me vendim të Këshillit Kombëtar të Territorit
Por bashkitë që nuk kanë plane rregulluese mund të lëshojnë leje ndërtimi për objekt me qëllim investimi publik ose privat, për ngritje rrjetesh shërbimi ose sigurie publike, të rrjetit elektrik, rrjeteve të ujësjellësit, të kanalizimit, të ngrohjes, të telefonisë, internetit, të kanaleve të kullimit apo kanaleve të ujitjes, leje të sinjalistikës rrugore etj, nga operatorë publik/privat që ofrojnë apo synojnë ofrimin e shërbimeve publike/private sipas legjislacionit në fuqi.
Gjithashtu në bashkitë që nuk kanë plane rregulluese lejohen ndërhyrje me karakter emergjent- objektet që paraqesin rrezik shembje me pasoja për jetën, shëndetin e njerëzve, pasurinë e të tretëve apo që paraqesin dëmtim serioz të konstruksionit dhe funksionit të strukturave ekzistuese.
Gjithashtu lejohen struktura me funksion prodhues, industrialë, përfshirë dhe ato me material porositës, struktura me funksion turistik dhe objekte në funksion të prodhimit, përpunimit dhe distribucionit të produkteve bujqësore dhe blegtorale.
Bashkitë të cilat kanë plane rregulluese dhe lëshojnë leje online
Himarë
Lushnjë
Berat
Kamëz
Tiranë
Fier
Vorë
Mamurras
Durrës
Shkodër
Rrogozhinë
Fushë-Krujë
Bulqizë
Korçë
/Monitor
