Kryeministri Edi Rama ka reaguar pas akuzave të kryetarit të Partisë Demokratike, Lulzim Basha se zgjedhjet në Dibër u fituan nga një kartel droge dhe pas denoncimit të “Fiks Fare” me video se si vëllai i Muharrem Ramës ka blerë votat.
Rama ka zgjedhur një status në Facebook ku kreu i qeverisë shqiptare e nis me një falënderim dhe me një shprehje të urtë të popullit.
“Faleminderit! Fjalët e tepërta janë vërtet fukarallëk, nën dritën e rezultatit kuptimplotë të zgjedhjeve të Dibrës! I falenderoj megjithë zemër, një për një, të gjithë zgjedhësit dibranë, për besimin e jashtëzakonshëm që na dhanë, përmes votës për kryebashkiakun Muharrem Rama” – shkruan Rama që më pas u përgjigjet akuzave.
“Dhe dëshiroj të nënvizoj se këtë fitore të madhe, unë e lexoj mbi të gjitha si një detyrim shumë të madh ndaj dibranëve. Me mirënjohje të thellë, angazhim të madh e përunjësi në detyrë, ne do të bëjmë çmos të jemi në lartësinë e nderit të posaçëm që na bëri Dibra, me besimin e paçmueshëm që na dha sot!
#Rilindje
#ShqipëriaeGjeneratësTjetër
#QentëLeTëLehinKarvaniDoEcëPërpara” – shkruan Rama.
