Kryeministri i Britanisë së Madhe, Boris Johnson ka dalë pasditen e sotme nga spitali, pasi gjendja e tij shëndetësore paraqitet e stabilizuar.
Lajmi është konfirmuar nga zyra e kryeministrisë, por ai nuk do të kthehet menjëherë në krye të detyrës.
“Kryeministri është nxjerrë nga spitali dhe do të vazhdojë rikuperimin në Chequers. Me këshillë të skuadrës së tij mjekësore, KM nuk do të kthehet menjëherë në punë. Ai dëshiron që të falenderojë të gjithë tek Spitali Shën Thomas për kujdesin brilant që i ofruan. Mendimet e tij janë për personat që janë të prekur nga kjo sëmundje.” – u shpreh një zëdhënës i qeverisë britanike.
Kryeministri britanik u shtrua në spital të dielën e kaluar pasi simptomat e virusit nuk po i largoheshin. Pas përkeqësimit të simptomave, Johnson kaloi edhe tre ditë në njësinë e kujdesit intensiv.
Johnson njoftoi se rezultoi pozitiv për koronavirusin në 27 Mars. Ai tha se po përjetonte “simptoma të buta” dhe se do të vazhdonte të udhëheqë vendin, ndërsa qëndronte i izoluar në banesën e tij në Downing Street.
