Tashmë është zyrtare. Real Madridi ka publikuar një njoftim për uljen e pagave të futbollistëve që shkon në masën 20 për qind të pagave të tyre. Kjo masë e marrë për shkak të krizës së Koronavirusit, prek lojtarët dhe trajnerët e skuadrave të para të futbollit dhe basketbollit.
Në shënimin zyrtar, klubi mbretëror thekson se vendimi në fjalë, në marrëveshje midis kapitenëve dhe drejtuesve të njësisë, është marrë “vullnetarisht”, duke siguruar kështu që të gjithë punëtorët në klub të marrin pagesën e tyre të plotë.
“Ky vendim, i miratuar nga lojtarët, trajnerët dhe punonjësit, shmang masat traumatike që mund të prekte pjesën tjetër të punëtorëve. Gjithashtu kontribuon në arritjen e objektivave ekonomike, për të zhvlerësuar në njëfarë mënyre ndikimin që do të ketë ulja e të ardhurave në këto muaj, si rezultat i pezullimit të garave dhe të paralizës së një pjese të madhe të aktiviteteve tregtare “, shkruhet më të në njoftim.
Kjo masë do të jetë e vlefshme deri në përfundimin e sezonit aktual.
